IKolishi lezeSayensi yezeMpilo liklomelise oMabhalane Abakhulu nabathole iziqu zeMastazi emcimbini wakusihlwa.I-CHS Ithakasele Izinga Lokuphumelela KoMabhalane Abakhulu
Click here for English version
IKolishi lezeSayensi yezeMpilo e-UKZN belinomcimbi wesibili wokuklomelisa oMabhalane Abakhulu eMhlanga ukubungaza labo abaphumelele ukuhlolwa e-College of Medicine of SA (e-CMSA), ongoti abangakagcwali nalabo abazuze iziqu zeMastazi kwezoKwelapha (ama-MMED).
UMholi woHlelo lokuQeqeshwa koMabhalane Abakhulu, uDkt Suvira Ramlall, uthe: ‘SiyiKolishi lezeSayensi yezeMpilo, siyaziqhenya ngokusho ukuthi izinga lokuphasa ekuhlolweni likhuphukile lisuka kumaphesenti awu-43 ngowezi-2018, laya kumaphasenti awu-57 ngesigaba sokuqala nesesibili ngowezi-2019, ngezinga elingamaphesenti awu-70 ngesigaba sesibili ekuhlolweni kwalaba abaqala ukuba wongoti. IKolishi Lezifundo ZezeMpilo liphasise abafundi abangama-96 kuMastazi kwezoKwelapha ngowezi-2019. Yinto enkulu edinga ukuthakaselwa lena.’
U-Ramlall uthe ziningi izinto ezingaba yimbangela yokwenyuka kwezinga lokuphumelela njengokuthi ezinyangeni eziyishumi nesishiyagalombili ezedlule, uMnyango wezeMpilo ne-UKZN bavumelene ngenqubo yokubheka nokweseka oMabhalane Abakhulu. Lokhu bakwenze ezingeni labantu ngamunye nasezikhungweni abakuzo kwezemfundo, kwezokweluleka ngengqondo nasekuqeqesheni.
Kuma-Registrar Awards angowezi-2019 bekukhona imiklomelo ekhethekile i-Good Fellow Award, i-Best Registrar Research Award ne-Best Clinician Teacher Award.
IPhini leSekelashansela eKolishi, uSolwazi Busi Ncama, uthe: ‘OMabhalane Abakhulu kudingeka basebenze ngokuzikhandla noma sebeshayisile emsebenzini kepha bebe beqhuba izifundo zabo. Silapha ukuzobahalalisela ngomsebenzi wabo obongekayo kwezempilo esifundazweni sethu. Akuvamile ukuthi lezi zinsika kwezempilo zibongwe, ziklonyeliswe.’
IDini eyiNhloko yeSikole KwezokweLapha e-UKZN, uSolwazi Ncoza Dlova, inxuse ongoti abasha ukuthi bashintshe indlela okwenziwa izinto ngayo kulo mkhakha. ‘Khumbulani ukuthi oMabhalane bazobukela kinina, ngakho yibani yisibonelo. Uma nithatha lezo zikhundla, nikhumbule ukuthi ubuholi abusho ukuziqhayisa kepha busho ukusebenza nokuba ngabaholi abazinikele ukusebenzela abantu.’
Isikhulumi esiqavile, uSolwazi Mike Sethekge, umcwaningi ohlonishwayo emhlabeni neNhloko yoMnyango we-Nuclear Medicine e-University of Pretoria, sibalule umsebenzi omuhle ekwelashweni komdlavuza eNingizimu Afrika.
Ama-MMED Research Awards atholwe yizo zonke izikole okungeseZokweLapha, ese-Laboratory Medicine and Medical Sciences, ese-Nursing and Public Health nese-Health Sciences.
Onqobe i-Good Fellow Award ukhethwe ngabalingani bakhe. Lapha kuklonyeliswa oMabhalane Abakhulu abakhombisa ukwehluka kwabanye ngokwesimilo sabo nokwenza okungaphezu komsebenzi abawuqashelwe. Ama-Registrar Awards aklomelisa uMabhalane Omkhulu nothisha ovelele eKolishi lezeSayensi yezeMpilo.
UNkk Julia Taylor wase-Investec engabanye babaxhasi, uthe: ‘Kunika ithemba ukubona ubuhle obunje endimeni yezempilo, impela ezempilo zisezandleni ezifanele kanti siyaziqhenya ukubambisana neKolishi lezeSayensi yezeMpilo lase-UKZN. I-Investec izimisele ukutshala kakhulu endimeni yezempilo.’
Amagama: ngu-Lihle Sosibo
Izithombe: Zithunyelwe yi-Investec